سيريا ديلي نيوز -  المحامي : حسام كريم الدين

مقالنا اليوم مستمدينه طبعاً من قانون الأحوال الشخصية السوري النافذ بالنسبة للأحوال الشخصية للمسلمين .

الوصية متل ما عرفتها المادة 207 من قانون الأحوال الشخصية هي : " الوصية تصرف في التركة مضاف إلى ما بعد الموت " .

أول شي بدنا نحكي فيه هو انو مو شرط انو الوصية تكون بالكتابة ممكن إذا كان الشخص ما بيعرف الكتابة إنو يوصي بالإشارة أو شفوي ، و من شروط أنو الوصية تكون صحيحة (( ما تكون بشي مخالف شرعا )) مثلا حدا يوصي انو يحرم حدا من الميراث فهاد شي باطل ، و بيجوز تكون الوصية متعلقة بالمستقبل و انها تتقيد على شرط صحيح يعني يكون بالشرط مصلحة مشروعة للموصي أو الموصى له . وعهاد الشي نصت المادة / 208 / : " تنعقد الوصية بالعبارة أو بالكتابة فإذا كان الموصي عاجزاً عنهما انعقدت الوصية بإشارته المفهومة " . و المادة / 209 / : " تشترط في صحة الوصية ألا تكون بما نهى عنه شرعا " .

علما انو اذا المتوفي كتب شرط مو صحيح بالوصية بيلتغى الشرط يلي كتبو و بتضل الوصية صحيحة

أ- الشروط في الموصي : أن يكون قادر على التبرع قانوناً يعني حر الارادة و بالغ السن القانونية 18 سنة

علما انو بيجوز للسفيه أو لذو الغفلة - يلي بيوقع بالساعة - يكتب وصية بعد ما ياخد اذن القاضي الشرعي

ب- شروط بالموصى له : أن يكون شخص معلوم يعني تقول بالوصية وصيت لفلان الفلاني ابن فلان بكذا

و اشترط القانون أنو يكون موجود الموصى له لما اتوصالو و لما توفي الوصي .

و بيجوز الواحد يوصي لأعمال البر بدون تحديد الجهة و بيجوز يوصي لأماكن العبادة و المؤسسات الخيرية

و إذا عندك رفيق من ملة تانية فيك توصيلو القانون سمح بالوصية لشخص من ديانة مختلفة أو ملة طبعا إذا كنت رح توصي لحدا أجنبي لازم يكون قانون بلدو بيسمح بالوصاية للأجانب كمان من المبدأ القانوني المعاملة بالمثل .

د- شرط بالشي يلي رح توصي فيه : أنو يكون قابل للتمليك يعني ما فيك توصيلو بشي ما ممكن يتم تملكو

و أنو يكون الشي الموصى فيه موجود بملكية الموصي إذا كان محدد هالشي بالذات يعني ما فيه الموصي يوصيلك ببيت جيرانكن حسب المادة / 209 / .

و فيه يوصيلك بشي أخد فيو حق المنفعة متل مثلا يوصيلك باستخدام العقار مثلا المأجور من قبل المرحوم بعد وفاتو .

بالنسبة للوصية المالية أكتر شي فيك توصي فيه هو ثلث التركة بعد سداد الديون على المتوفي يلي رح تتركها يعني ما تتبحتر أكتر من هاد المبلغ بيصير بدو موافقة الورثة عليه و لحدا من غير الورثة  و الا بيصير كمان بدها إجازة من الورثة على الزيادة لأن النص بيقول ( لا وصية لوارث ) . وعلى هاد الشي نصت المادة 218 من قانون الأحوال الشخصية المادة / 218 / " تصح الوصية بإقراض الموصى له قدراً معلوماً من المال ولا تنفذ فيما زاد من هذا المقدار على ثلث التركة إلا بإجازة الورثة " .

و المادة / 238 / حكيت عن موضوع إجازة الورثة في حال أحد الموصى لهم من الورثة أو بما يزيد عن ثلث التركة فقالت : "

1- تنفذ الوصية لغير الوارث بثلث ما يبقى من التركة بعد وفاء الدين من غير إجازة الورثة

2- لا تنفذ للوارث ولا بما زاد على الثلث إلا إذا أجازها الورثة بعد وفاة الموصي وكان المجيز كامل الأهلية

3- لا تنفذ فيما يستغرقه دين إلا بإجازة الدائن الكامل الأهلية أو بسقوط الدين

4- تنفذ وصية من لا دين عليه ولا إرث له بكل ما له من غير توقف على إجازة أحد " .

فيك توزع و انت على قيد الحياة ؟

المادة 219 قالت فيك تخصص بعض أو كل من الورثة بأعيان من مالك بتاعدل حصته الارثية و انك توصي بتنفيذ هذا التخصيص بيكون جائز و لازم بوفاتك ، بس إذا خصصت شي زيادة عن الحصة يلي رح تطلعلن بينطبق على الزيادة حكم وصية الوارث يعني ((( لا وصية لوارث ))) .

طبعاً في موضوع هون ضوري نشير إلو هو انو الشخص يلي مثلاً أب حابب يوزع للأبناء على حياتو بإنو يعملن بيع مع الاحتفاظ بحق المنفعة مدى الحياة بتصير قانونا و جائزة يعني لنشرحها انو تبيعن ملكية البيت تبعك بس تضل محتفظ بحق الانتفاع من البيت تضل عم تستفيد منو و تستخدموا مدى الحياة بحب نوه هون لفكرة انو لازم تنتبه انو ما يكون الموصي بعمر كبير قريب من السن الوفاة الطبيعي لان فيه أحد الورثة أو صاحب المصلحة يرفع دعوى يبطل البيوع بما يسمى ببيع مرض الموت و اله حالته و تفصيلاتها .

إيمتى بتكون الوصية باطلة ؟

- إذا جن الموصي جنان كامل قبل ما يموت .

- إذا بعد ما وصيت لشخص مات هاد الشخص قبلك .

- إذا وصيت بشي و صار سبب خلاه يفنى هالشي يحترق مثلا  ويصير رماد .

- في حال بطّل الموصي و رجع عن وصيتو قبل الوفاة .

- بحالة الموصى الو رد الوصية بعد الوفاة يعني ما قبلها .

و ضروري نوه في حال الموصي بطل الوصية فأي فعل أو تصرف منو بيدل على انو بطل عن الوصية ازا ما صرح انو ما قرر يرجع عن الوصية فهون يعتبر كأنو بطل متل مثلا يبيع العقار الموصي فيه لشخص معين نصت المادة / 221/ على التالي :

" يعتبر رجوعاً عن الوصية كل فعل أو تصرف يدل بقرينة أو عرف على الرجوع عنها ما لم يصرح الموصي بأنه لم يقصد الرجوع " .

ايمتى بتنحرم من الورته ؟

إذا قتلت الموصي بغض النظر كنت الفاعل الأصلي للجريمة او شريك شريطة يكون القاتل بالغ ال 15 سنة

او انك تسبب قاصداً بقتل الموصي حتى لو شهدت شهادة زور أدت إلى قتلو 

انطلاقا من قاعدة من استعجل الشيء قبل أوانه عوقب بحرمانه ، طبعاً في استثناء بهل المادة بيقول انو قتل الموصي بلا حق ولا عذر , يعني إذا كان قتلت  الموصي بحق ما بيروح الورث عنك متل انو مثلا حالة الدفاع عن النفس أو الشرف بمواجهة الموصي .

و هاد نص المادة /223 / : "

يمنع من استحقاق الوصية الاختيارية أو الواجبة

أ ـ قتل الموصى له للموصي قصداً سواء أكان القاتل فاعلاً أصلياً أو شريكاً إذا كان القتل بلا حق ولا عذر، وكان القاتل عاقلاً بالغاً من العمر خمس عشرة سنة

ب ـ تسببه قصداً في قتل الموصي، ويعتبر من التسبب شهادته عليه زوراً إذا أدت إلى قتله " .

مين بيقوم بتنفيذ الوصية ؟

عادة الموصي بيقوم بتعين ناظر للوصية و منفذ الها في حال ما عين فالقاضي بيقوم بتعين منفذ للوصية، حسب نص المادة / 233 / الفقرة الثانية : " من له تنفيذ الوصية هو الوصي المختار فإن لم يوجد فالقاضي أو من يعينه لذلك ".

الوصية للجنين بتصير ؟

مسموح قانوناً بس لازم نراعي عدة نقاط منها : اذا اقر الموصي قبل وفاتو بوجود الحمل يشترط انو يولد المولد حي لسنة أو أقل من تاريخ الوفاة ، و إذا كانت المرأة معتدة من الوفاة أو بفرقة بائنة من المتوفي ف يشترط أيضاً ولادة المولود حي لسنة أو أقل من تاريخ الوفاة اما اذا الوصي ما كان مقر بإنو زوجته حامل او الحامل كانت بالعدة عند الوفاة يشترط انو المولود يولد لتسعة أشهر و أقل من تاريخ الوفاة حسب أحكام المادة / 236 / من قانون الأحوال الشخصية  .

و أخيراً العقارات الأميرية بنحكي عنها بمقال منفصل بيتم بالنسبة لهاد النوع من العقارات توزيع الحصص الإرثية فيها بيكون بالتساوي .

 

التنويه  : إن هذا المقال كتب باللهجة العامية المحكية لسهولة إيصال المعلومة و سلاسة القراءة ، وهو عبارة عن مقال مختصر و مبسط للموضوع ، جميع حقوق الملكية الفكرية محفوظة و في حال نسخ المعلومة  يرجى الحفاظ على الأمانة العلمية بالنقل .

 

للتواصل مع كاتب المقال لمزيد من المعلومات أو الاستشارات القانونية حول الموضوع :

Mobile : 0948889987

E-Mail : [email protected]

Facebook : https://www.facebook.com/hussam.KRE

Twitter : https://twitter.com/hussamkreem