أكدت عضو مجلس الشعب الدكتورة "رانيا حسن" في مداخلة تحت قبة المجلس أن "الحكومة التي تسحب لقمة الخبز من فم المواطن حكومة يجب أن تستقيل"، مضيفةً : "سيدي الرئيس الخبز خط فوق الأحمر .. الحكومة بواد و لشعب بواد" .
 وتوجهت "الحسن" بكلامها إلى رئيس مجلس الشعب قائلةً : "سيدي الرئيس هون تحت القبة من كم شهر حكينا بفرز المهندسين و بعد سنة انفرزوا غلط وهلى بموضوع الدعم نفس الشي غابوا ست شهور ورجعوا طبقوا غلط ... شو الفكرة .. برأيكن الوضع قابل للتجريب؟" .
 وتابعت : "الناس عايفة حالها .. المواطن مانو حقل تجارب .. بيكفي لعب بالمواطنين .. يا ترى حسبت الحكومة يلي عندها كل هالمعلومات عنا حسبت تكلفة المعيشة بحدها الادنى لأسرة فيها 5 اشخاص؟ " .
 
وأردفت الحسن : "سيدي الرئيس .. زملائي .. هل من المنطق إلغاء الدعم عن شريحة كاملة من جرحى الحرب يلي ضحوا بأغلى شي عندن و ذنبن انن استفادوا من مشروع جريح وطن يلي اكرمن فيه السيد الرئيس و هالمشروع الصغير كان بدو سجل تجاري ؟" .
 وتساءلت عضو مجلس الشعب : "هل من المعقول أن يلغى الدعم عن أسرة شهيد لان الشهيد طلع خارج القطر ؟ .. والأهم اي شريحة الغي الدعم عنها ؟ شريحة الطبقة الوسطى ؟ شريحة الناس يلي يا دوب على قيد الحياة عم تشتغل ليل ونهار بس لتعيش بكرامة" .
 واستطردت الحسن قائلةً : "هي الطبقة كلها بقيت بالبلد و بوظائفها كل فترة الحرب.. اذا مهندس أو طبيب أو أستاذ جامعة أو أستاذ ابتدائي عندو سيارة عم تمشي بقدرة قادر اشتراها من 20 سنة ما معناها انو فيه يدفع حق خبز لعيلتو 80 الف بالشهر" .
ومن وجهة نظر "الحسن" فإن خطوة رفع الدعم أدت إلى سحق الطبقة الوسطى نهائياً، مضيفةً : "عم نكبر المشكلة اكتر و اكتر .. شيلو الدعم عن الفاسدين .. شيلو الدعم عن يلي فعلا ما بدن دعم واساسا هدول ما كتير فارقة معن القصة وتلقائيا ما بيوقفو ع دور الغاز ودور الخبز وفكرة الغاء الدعم كانت ع اساس مشانن لناخد هالفائض وندعم اقتصادنا مو لنزيد الفقر فقر" .
 
وطالبت عضو مجلس الشعب السوري في ختام مداخلتها بإلغاء قرار رفع الدعم، قائلةً : "ألغوا قرار إلغاء الدعم .. باسم الشعب الذي نمثله ألغوا هذا القرار .. أطالب جميع زملائي بالتصويت على إلغاء القرار وفورا"