تم الإعلان عن تصميم جديد للوحات السيارات في سورية، وبأن التصميم الجديد الذي أعدته المؤسسة العامة للخط الحديدي الحجازي بالتعاون مع وزارتي النقل والداخلية، يتألف من 5 أرقام على الجانب اليميني للوحة، ورقمين على الجانب اليساري، وفي الوسط صورة العلم السوري، وكلمة سورية.

ومن المتوقع طرح اللوحات الجديدة خلال عام 2019، مع عدم معرفة ما هي التكلفة التي ستجبى من جيوب أصحاب السيارات لقاء هذا التصميم المزمع.
الشعب ح يجن!
فيما يلي بعض التعليقات التي أوردها بعض المواطنين تعقيباً على الإعلان أعلاه:
«طولو بالكم لنخلص من قصة الذكاء بالبطاقات بعدين عملولنا بلوة جديدة، والله الشعب ماعد لحق مصايب ارحمونا».
«وبذلك سوف يتأمن الغاز والمحروقات وتنخفض الأسعار ويعم الدفء في المخيمات والأمان في البلاد، وينخفض الدولار وتعود للمواطن حقوقه وكرامته المهدورة ويحاسب المرتشون ويقضى على الفاسدين و.. «لاحول ولا قوة الا بالله العظيم من هيك مسؤولين».
«شلون بدهم يكفروا المواطن ما عم يعرفوا.. روحوا حلوا أزمات الشعب بالأول».
«يا أخي شو بدنا إنجازات حكومتنا كلها معجزات، الناس ماتت من الجوع والبرد والحكومة مهتمة بلوحة السيارة».
«هلق ميشان الخازوق إيمتا دورو مشان نجهز حالنا».
«كلشي قرارات بتطرحوها بتنفذوها بعد فترة إلا قرار زيادة الرواتب بعدكم عم تدرسوها خليكم عم تدرسوها شي سبعين سنة أي».
«لك عمي قبل التصميم والزفت حركو حالكن شوفو شي حل لهل شعب قبل ما يقلب عليكن ...الشعب لح يجي يوم ويجن جنانو ع جميع الأطراف».
نفط وغاز وبرد
خبر من الصفحة الرسمية لرئاسة مجلس الوزراء على «فيسبوك» يقول: «المهندس خميس يكلف مجموعة عمل تتضمن حاكم مصرف سورية المركزي، ووزيري النفط والمالية، ومكتب تسويق النفط لمتابعة توريدات المشتقات النفطية، والاجتماع بشكل يومي لرصد المخازين الإستراتيجية لها منعاً لحدوث أي اختناق».‎
وفيما يلي بعضٌ من تعليقات المواطنين على الخبر أعلاه:
«استوى المواطن.. وتأخر الإجراء.. وناطرين نلمس نتيجة مرجوّة».
«ما أشطرنا بتشكيل اللجان».
«شر البلية ما يضحك.. حكومة بكامل الكوادر والمدراء والموظفين.. وبعد ٨ سنين حرب وحصار لسا لليوم ما عندن آلية لضبط ومراقبة المخازين الإستراتيجية وكل شتوية الوزراء الكيوت بينصدمو انو زاد الطلب ع المشتقات النفطية».
«كثرة اللجان مضيعه للوقت وهدر للمال العام، لو كل مسؤول تابع عمله لا حاجة للجان متابعه، لأن اللجان مقبرة القرارات وتغطية للتقصير والفساد».
«بكير والله استنو شوي تَيروحو هالبردات منشان راحتكن».
«سيدي الكريم المشتقات النفطية وعلى رأسها الغاز المنزلي مفقودة بشكل كامل وليست مختنقة».
«يعني في أمل.. أم هالشي تخدير.. غداً لناظره قريب».
كهربائيات
خبر على الصفحة الرسمية لوزارة الكهرباء يقول: «وزير الكهرباء المهندس محمد زهير خربوطلي يقوم بجولة تفقدية في محطة تحويل باب شرقي ٦٦/٢٠ مطلعاً على سير أعمال إصلاح المحولة الثانية بعد تعرضها لعطل فني.. فيما تواصل ورشات الكهرباء أعمال الإصلاح متحدية الظروف الجوية لإعادة التغذية الكهربائية للأخوة المواطنين».
وفيما يلي بعض تعليقات المواطنين التي وردت على الصفحة نفسها:
«يعني والله هل الحكي ما بصير من ٣ العصر لهلأ بركن الدين أسد الدين ما في كهربااااااا».
«جهودكم فعلاً كبيرة ونشاط السيد الوزير أفضل من يلي سبقوه بس هالمحوﻻت كلها بدها كب.. روحو جيبو محوﻻت تناسب الاستهلاك لعام 2025 أو خلونا على العتمة».
«وشو مشان الكهربا بسهل الغاب شطحه جورين... نحنا منسيين من قبل الكهربا... لا عرفنا تقنين ولاعرفنا عطل ولا عرفنا شي».
«شو مشان الكهربا بمنطقة وادي بردى؟؟ يلي لتضل مقطوعه ليلاً نهاراً بتجي ثانية وحدة بالضبط وبتنقطع بفرد سحبة ١٢ ساعة يعني وبعدين وبعدين يا الله؟؟ لاقولنا حل ما في غير بوادي بردى لك عِفنا حياتنا وين هالخدمات بقا وين».
«طيب الأخوة المواطنين بركن الدين صلاح الدين من 6 ساعات ما شفنا الكهربا.. وما بعرف ليش عنا شي أسمو طوارئ كهربا إذا ما بدن يردو.. ع أساس مافي تقنين قاسي وقت المنخفض إي لعنتو أفطاسنا».
«يشرّف ع منطقة ببيلا من ٢٠ يوم ما شفنا الكهربا».
السكن الشبابي للأحفاد
من صفحة رئاسة مجلس الوزراء الرسمية خبر يقول: «وزير الأشغال العامة والإسكان المهندس سهيل عبد اللطيف: تخصيص /3000/ شقة في محافظات دمشق وحمص وحلب من سكن الادخار والسكن الشبابي لتسليمها للمكتتبين عليها».
وفيما يلي بعض التعليقات التي أوردها المواطنون على الخبر أعلاه:
«والسكن الشبابي في اللاذقية شو وضعوا من١٤عام مسجل عليها».
«وطرطوس يلي مابتستحوا.. مشروع السكن الشبابي رح يستلموه ولاد ولاد ولادنا».
«طيب وحماة شو قصة التأخير فيها للسكن الشبابي والحمد لله مدينة حماة كانت وما زالت آمنة وكتير تأخروا بتسليم السكن مثلاً من الشهر الرابع لعام ٢٠٠٤ سجلت بالسكن الشبابي ودفعت السلفة وقتها ستون ألف ل.س وملتزم بالقساط كل شهر ولا تخلفت عن قسط مثل ما طالبين من المكتتبين وبنراجع فرع مؤسسة الإسكان بحماة لحد الآن بيقولولنا ما في أي شي جديد».
بوستات فضفضة
ونختم بـ «بوست» متداول على الصفحات الشخصية والعامة:
«كل يوم بيتفاجئ المواطن السوري بقرار جديد وكأنو في سباق أو تحدي بين الوزارات مين اللي بيمسح الأرض بالمواطن أكتر.. لا تستغرب عزيزي المواطن يطلع قرار بكرا أنو لازم تجدد عقد الزواج سنوياً يعني «ترخيص»، وبتصير مرتك متل سيارتك والترسيم حسب الوزن.. إذا كانت تحت ٦٠ كيلو بتدفع ١٥ ألف وإذا كانت بين ٦٠ و ٩٠ كيلو بتدفع ٥٠ ألف أما إذا كانت ٩٠ ومافوق بتدفع رسوم ٣٠٠ ألف، وانتبه إذا تأخرت سنتين بتدفع ضريبة إنفاق إستهلاكي وإعادة إعمار.. وإذا المدام كانت عاملة عملية تجميل وبوتوكس وسيليكون وطارشة وجها بويا وصابغة شعرها بتدفع غرامة تغيير مواصفات وتغيير لون وإذا كانت محجبة بتدفع غرامة فيميه».
و»ناقل الكفر ليس بكافر».