مرحبا شباب... أنا اليوم معصب كتير ...  لك الله يلعن السيارات ... ويلي اخترع السيارات ...
فقت الصبح  من النوم مكسر تعبان لان مبارح كان عندي ورشة باطون بالبيت، كان بدي اشرب قهوة،  طلعت خالصة القهوة وبتعرفو القهوة غليانة لسا ماصار اول الشهر موعد قبض الراتب المهم وبلا طول سيرة، طلعت و وجهي

كاشش ومابيضحك للرغيف السخن، حاولت شغل السيارة و اذ بالدولاب مبنشر رحنا زبطناه عند الكومجي  شغلت السيارة ورحت وانا وصلت بمنطقةالبرامكة، وإذ هالسيارة بلشت تطبطب وطفت لحالها" لامن كمها ولامن تمها" طلعت

يمين وشمال ما لقيت ولا محل ليساعدني" واذ بشب واقف عبسطا قلي شبها السيارةمعلم
قلت: طفت لحالها
قلي :انا بساعدك  وبلش يفحص السيارة شي من فوقها وشي من تحتها راح وقف وقلي هاي عطلها كذا كذا
جاوبتوأنت شوعرفك انت
 قلي :له يازلمي اناميكانيكي
قلت طيب اذا ميكانيكي وين محلك مشان نشحط السيارة لعندك راح اشرلي عالبسطة يلي كان واقف جنبا، استغربت وقلت له أنا عم اضحك و لك شوعم تمزح معي
 قلي: لاوالله بس هالبسطة حاليا  هي محلي انا، ومن باب كتر الغلبة طلعت يمين ويسار واذ هالبسطات معباي جنبو وكلها بسطات تصليح سيارات والاحلى كل واحد مختص بنوع معين من السيارات شي مختص بمرسيدس وشي بيجو وشي سابا.
طلعت فيه وقلتلو: يلا بلش مافي نص ساعة واذ هالسيارة رجعت تشتغل متل العروس"الله يحميلي ياها ويجيرها من العين" أجى وقت الحساب والله يحاسب الجميع ، سألنا اديش بتريد يا حبيب، راح طلب زيادة عن اللزوم قلتلو لك ليش هيك يازلمي رجع قلي نفس الحكي يلي بسمعها من كل التجار والباعة "الدولار طالع والبضاعة غليانة ومافي استيراد"وبلش يشكيلي ويبكيلي كان فاتح محل مدري بأي منطقة والمحل اتهدم وتشرد هوي وعيالو ومن هالحكي "شوي تانية كنت رح ابكي ياشباب"اخيرا عطيتو الاجرة وشكرتو وقلتلو"انشالله الله يفتحها بوجهك وتفتح بسطة تانية"
بس عنجد يا شباب نحنا السوريين منقدر نستمر بالحياة وبالشغل رغم كل المؤامرات الكونية وكل ظروف الأزمة على البلد وما في أسهل من البدائل تهدم المحل منفتح بسطة راح البيت منعمل خيمة
وبالنهاية اوجه الشكر للارصفة يلي صارت تساع لكل بسطات الدني واشتريت خرزة زرقا وعلقتا مشان العين.