خاص سيريا ديلي نيوز -  المحامي : حسام كريم الدين

اليوم رح نحكي بموضوع كبير و كتار ما بيعرفو شو تبعات هاد الموضوع فينا نقول بيتم بإدعاء اسم الحب أو الضحك على شباب و بنات العالم ،  أو مصالح مشتركة أو الرغبة عند الشب و الصبية أو الجهل أو الكبت أو بأي دافع كان مقتنع فيه الطرفين أو أحدهن  هالظاهرة الخطيرة المتفاقمة يلي بنشوفها بقاسيون و بإحدى الجزر بإحدى المناطق السكنية بالليل  .

 حبيت احكي بهاد الموضوع حتى نسلط الضوء للشباب و الصبايا على خطورة هاد الموضوع من الناحية القانونية ويكون عندك فكرة لو تم ارتكاب هاد الفعل  بس من باب المعلومة و التثقيف القانوني لو حدا كان بهل الموقف و وقفتو دورية الشرطة شو يلي رح يصير فيه ! و شو العقوبة و شو الترتيب على حسب الشي يلي كان عليه الوضع بالسيارة بوقتها ، وانو الحكي يلي رح يصير بالضبط بالقسم بيفرق جداً ، ورح نحكي بأخر المقال في حالة الزواج من المعتدى عليها .

 

 بهاد المقال رح نحكي بس عن أنو ما وقع الفاس بالراس ،  و لسى ما صار شي كامل بين الطرفين وفهمك عزيزي القارئ كفاية ، رح حاولنا قدر المستطاع انتقي المصطلحات في المقال حفاظاً على مشاعر الجمهور بالإضافة لأن الهدف الأساسي هو التوعية ولا حياء في العلم .

 

#البداية :

الفكرة الاولى : حالة انك عرضت على بنت هيك مشوار و ما وافقت و راحت اشكت عليك و حتى هالمادة يلي رح نذكرها بتشمل التلطيش بكلمات من تحت الزنار و نازل  فبتكون بهالحالة العقوبة الحبس 3 أيام او غرامة مالية خمس مئة ليرة سورية ، المادة 506 من قانون العقوبات السوري قالت : " من عرض على قاصر لم يتم الخامسة عشرة من عمره أو على فتاة أو امرأة لهما من العمر أكثر من خمس عشرة سنة عملاً منافياً للحياء أو وجه إلى أحدهم كلاماً مخلاً بالحشمة عوقب بالكبس التكديري ثلاثة أيام أو بغرامة لا تزيد على خمس مئة ليرة – حسب التعديل الأخير للغرامات - .

#موضوعنا :

شب وصبية بالسيارة بليلة من الليالي و إذ بدورية شرطة كبست عليهن ، وصار الشرطي على شباك السيارة .. و أخدوهن على قسم الشرطة صار هون بقى عنا حالتين مهمين ( 1- برضا البنت . 2-  و بعدم رضاها وبينقسم لقسمين حسب مكان اللمس أو الفعل لـ أ- فعل منافي للحشمة . ب- فعل منافي للحياء . رح نحكي بالتفصيل والفرق .

  

1- برضا البنت :

#العقوبة :

بعد الفضيحة و البهدلة للاتنين ، الجريمة يلي عم ترتكب هون بحق المجتمع هية جريمة التعرض للآداب العامة ! شو دخل المجتمع المجتمع هو صاحب السلطة بطلب إيقاع العقوبة و بتمثلو النيابة العامة و الفكرة هون انو هاد الفعل خاص و شاهدو حدا مالو علاقة انو يشوف هيك منظر قد يؤثر عليه كمثال .

شو العقوبة : العقوبة بتكون الحبس من 3 شهور لـ 3 سنوات حسب ما نصت المادة / 517 / من قانون العقوبات السوري يلي قالت : " يعاقب على التعرض للآداب العامة بإحدى الواسائل المذكورة في الفقرة الأولى ن المادة 208 بالحبس من ثلاثة أشهر إلى ثلاثة سنوات " .

 

2- مو برضا البنت :  

إذا بقى البنت لما راحت على القسم خافت من أهلها أو كان فعلاً مو برضاها وقالت انو مو برضاتي فهون الشب بيكون تورط و رح يتبهدل ناهيك عن انو بتفرق إذا كان يلي صار مو برضاها فقط أو كان صاير إكراه و تهديد و عمر البنت بيفرق و كمان لازم ننتبه لفكرة إذا كان يلي عم يصير بالسيارة موضوع مثالنا فعل منافي للحياء أو فعل منافي للحشمة ؟! شو الفرق بينن ؟ رح جاوبك عزيزي القارئ الفعل المنافي للحمشة فينا نميزو عن الفعل المنافي للحياء حسب القانون السوري بأنو الفعل المنافي للحشمة : التعرض للعورات أو المواضع الي بتعتبر من العورات و بيحرص الناس عادة على سترها ، ومو من الضرورة يكون تم الكشف عن العورات حتى نصير بحالة الفعل المنافي للحشمة ولا بالضرورة يكون صار إيلاج و هاد الشي حسب الاجتهادات القضائية لمحكمة النقض .

لهيك رح يكون عنا حسب ما حكينا أ- فعل منافي للحمشة . ب- فعل منافي للحياء .

#العقوبة :

أ- فعل منافي للحشمة : ( بقاصر أو بالتهديد )

عقوبة الفعل المنافي للحشمة إذا كانت البنت قاصر تحت 15 سنة بتكون العقوبة أشغال شاقة 9 سنوات حسب ما نصت المادة / 495 / بقولها : " 1- من ارتكب بقاصر لم يتم الخامسة عشرة من عمره فعلاً منافياً للحشمة أو حمله على ارتكابه عقوبة بالأشغال الشاقة تسع سنوات " .

أما في حال صار الإكراه على الفعل المنافي للحشمة بالعنف أو بالتهديد أو غير حالة المادة السابقة فالعقوبة ما بتقل عن 12 سنة أشغال شاقة و بيكون الحد الأدنى للعقوبة 18 سنة أشغال شاقة إذا كانت البنت طفلة تحت 15 سنة وهالشي حسب المادة / 493 / من قانون العقوبات يلي نصت : " 1- من أكره آخر بالعنف أو بالتهديد على تحمل أو إجراء فعل مناف للحشمة عوقب بالأشغال الشاقة مدة لا تنقص عن اثنتي عشرة سنة . 2- ويكون الحد الأدنى للعقوبة ثماني عشرة سنة إذا كان المعتدى عليه لم يتم الخامسة عشرة من عمره " .

 

 ب- الفعل المنافي للحياء : مجرد قبلات و لمسات غير ما بينت قبل شوي بالفعل المنافي للحياء  بتكون العقوبة مدة ما بتتجاوز السنة ونص للشب وهو شي يلي نصت عليه المادة / 505 / من قانون العقوبات السوري : " من لمس أو داعب بصورة منافية للحياء قاصراً لم يتم الخامسة عشرة من عمره، ذكراً كان أو أنثى، أو فتاة أو امرأة لهما من العمر أكثر من خمس عشرة سنة ( دون رضاهما ) عوقب بالحبس مدة لا تتجاوز السنة ونصف " .

 

- تزوج المعتدى عليها :

إذا عرض المعتدي الزواج على البنت المعتدى عليها و تم الموافقة و الزواج شو الوضع القانوني بهل الحالة ؟

حسب التعديل الأخير للمادة / 508 / من قانون العقوبات السوري فـ
بالنسبة لحالة الفعل المنافي للحشمة و غيرها من الجنايات ( بيستفيد مرتكب الفعل من عذر مخفف للعقوبة و ما بتقل عقوبتو عن سنتين بشرط لازم يضل مرتبط فيها 5 سنوات لإن إذا طلقها قبل بسبب غير مشروع بيتم إعادة محاكمتو .

أما بالنسبة للفعل المنافي للحياء و الجنح إذا تزوجها بتتوقف ملاحقتو و بيتوقف تنفيذ العقوبة كمان بشرط يضل متزوجها 3 سنوات .

و على هاد الشي نصت المادة / 508 / و تعديلاتها :  

 " 1- إذ عقد زواج صحيح بين مرتكب إحدى الجنايات الواردة في هذا الفصل وبين المعتدى عليها يستفيد مرتكب الفعل من العذر المخفف وفق أحكام المادة /241/ على أن لا تقل العقوبة عن الحبس سنتين.

ويعاد إلى محاكمة الفاعل إذا انتهى الزواج إما بطلاق المرأة دون سبب مشروع، أو بالطلاق المحكوم به لمصلحة المعتدى عليها قبل انقضاء خمس سنوات على الزواج، وتحتسب المدة التي نفذها من العقوبة .
2- إذا عقد زواج صحيح بين مرتكب إحدى الجنح الواردة في هذا الفصل وبين المعتدى عليها أوقفت الملاحقة ، وإذا حكم بالقضية علق تنفيذ العقوبة ويعاد إلى الملاحقة أو تنفيذ العقوبة إذا انتهى الزواج إما بطلاق المرأة دون سبب مشروع ، أو بالطلاق المحكوم به لمصلحة المعتدى عليها قبل انقضاء ثلاثة سنوات على الزواج . وتحسب المدة التي نفذا من العقوبة " .

 

بالختام عزيزي القارئ بتمنى تكون وصلت الصورة و الفائدة القانونية و نساهم كلنا بنشر التوعية خصوصي انو الظاهرة يلي عم نحكي عنها بهاد المقال للأسف متفاقمة و عم نشوفها بقاسيون أو بإحدى الجزر المعروفة بإحدى المناطق السكنية ، ولو كان في حدا للأسف عم يرتكب هذا الجرم أو سبق و ارتكبو و ما صار عليه شي أو الشباب يلي بتقول بتنفدى القصة بمبلغ من المال للدورية – تذكر انو في من رجال الشرطة الشرفاء و يلي ما بيقبل بهيك شي و ممكن تدمر مستقبلك نتيجة طيش شباب – و بنذكرو بأنو مو كل مرة بتسلم الجرة و لازم نبتعد عن هالتصرف الي ما بيمت للاخلاق و لا للقانون بصلة و أثارو مدمرة بالنسبة للطرفين لهيك الحذر واجب .  

***

 

التنويه  : إن هذا المقال كتب باللهجة العامية المحكية لسهولة إيصال المعلومة و سلاسة القراءة ، وهو عبارة عن مقال مختصر و مبسط للموضوع ، جميع حقوق الملكية الفكرية محفوظة و في حال نسخ المعلومة  يرجى الحفاظ على الأمانة العلمية بالنقل .

 

للتواصل مع كاتب المقال لمزيد من المعلومات أو الاستشارات القانونية حول الموضوع :

Mobile : 0948889987

E-Mail : [email protected]

Facebook : https://www.facebook.com/hussam.KRE