خاص سيريا ديلي نيوز -  المحامي : حسام كريم الدين

القانون لا يحمي المغفلين ! هالجملة المنتشر كمثل بين الناس بأنو القانون لا يحمي المغفلين عارية عن الصحة و العكس هو الصحيح ، رح احكي اليوم ووضح الصورة الحقيقي

 
أول شي بدنا نعرّف مين هن المغفلين ؟

 
المغفلين يندرج ضمنن حسب التعريف القانوني  :
 1- المجنون : هو الشخص المصاب بـ عله تصيب العقل فتفقده و تخل توازنه .

 2- المعتوه : و العته هو ما يعتري العقل من اختلال مما يجعل الشخص قليل الفهم فاسد التدبير .

 3- السفيه : و السفه هو إضاعة المال وتبذيره على غير مقتضى الشرع والعقل .

 4- ذي الغفلة : الغفله هي عدم الاهتداء الى التصرفات الرابحة نتيجة نقص في الادراك .

 5- يدخل في حكم المغفلين من شاب إرادتهم أحد عيوب الإرادة كـ الغبن - الاستغلال - من وقع عليه التدليس - أحد الوسائل الاحتيالية .

 

و حتى نوضح الصورة أكثر القانون حماية منو للمغفلين كمثال و ضع شروط خاصة بالتعاقد معهم و حتى أنو أبطل بعض تصرفاتهم متل تصرف المجنون لأن يشترط في العقد ( الإدراك و الأهلية للتعاقد )  ، وفي كتير حالات حمى فيها القانون المغفلين متل مثلاً المعتوه اعتبر القانون تصرفاته متل تصرفات الصبي غير المميز قابلة للإبطال و هاد موضوع يطول الشرح فيه و ما هون مربط كلامنا .

 

طيب شو #العبارة_الصحيحة ؟

((( القانون لا يحمي الغافلين و المفرطين بحقوقهم )))  ، طيب بيسأل سائل شو الفرق بين المغفلين و الغافلين

 

لنجاوبك عزيزي القارئ ففينا نعرف ببساطة الغافلين بأنهم من يقولون بجهلهم للقانون وعدم معرفتهم به .

يعني باختصار هن الاشخاص يلي بيقول و الله انا ما بعرف انو القانون بيعاقب على هاد الموضوع أو مفكر هاد الموضوع عادي و مافي مشكلة قانونية ...الخ

 

القاعدة القانونية الشهيرة بتقول ((( الجهل بالقانون لا يعتد به ))) يعني بمجرد ما القانون انتشر بالجريدة الرسمية و انت ما دريت فيه فهو نافذ المشكلة من عندك انك ما قرأت أو ما اهتميت او ما سألت أهل الاختصاص

 

و #أما_المفرطين بحقوقهم هن كمان مشابهين للغافلين ، و هالحالة  بتصير لما شخص بيكون بوضع أعطاه فيه القانون حق الرد أو المطالبة أو الدفاع و هو فرط بحقو ، كمثال الكل بيعرف بعد صدور الأحكام القضائية القابلة للطعن بتسري مدة الحق بالطعن من اليوم التالي لتبلغ الحكم غير الحالات الخاصة التانية ، فإذا افترضنا انو شخص صدر بحقو حكم و كان عندو أسباب الطعن و تبلغ القرار و طنش على الموضوع و فرط بحقو و مرت المدة المنصوص عنها بالقانون فهون القانون مو المشكلة فيه المشكلة بالمفرط و القاعدة القانونية بتقول : ( المفرط أولى بالخسارة ) .

 

لهيك العبارة الصحيحة هي : ((( القانون لا يحمي الغافلين و المفرطين بحقوقهم )))

 

بتمنى بنهاية المقال نكون استفدنا من المعلومة القانونية و اتعرفنا على الصح و على الترجمة القانونية الصحيحة للعبارة موضوع مقالنا .

 

 

 

التنويه  : إن هذا المقال كتب باللهجة العامية المحكية لسهولة إيصال المعلومة و سلاسة القراءة ، وهو عبارة عن مقال مختصر و مبسط للموضوع ، جميع حقوق الملكية الفكرية محفوظة و في حال نسخ المعلومة  يرجى الحفاظ على الأمانة العلمية بالنقل .

 

للتواصل مع كاتب المقال لمزيد من المعلومات أو الاستشارات القانونية حول الموضوع :

Mobile : 0948889987

E-Mail : [email protected]

Facebook : https://www.facebook.com/hussam.KRE