خاص سيريا ديلي نيوز  -  المحامي : حسام كريم الدين

شو ما كانت المناسبة فوز المنتخب ، تحرير منطقة ، عرس ، نجاح طالب و تخرج ، مهما كان السبب ف في مليون طريقة للتعبير عن الفرحة بدون ما تسبب نتائج كارثية ، دائما بعد أي احتفالية بنسمع أخبار عن واحد مات برصاصة طائشة او على الاقل انجرح او سيارتو اتكسرت اليوم رح نحكي عن المسؤولية القانونية من الناحية الجزائية فقط .

هاد النوع من الجرائم بيندرج تحت ما يسمى بالجرائم الغير مقصودة يلي بيكون الفاعل ما قصد لما ارتكبها تحقيق النتيجة الجرمية بس صارت بدون إرداته و نتيجة لخطأه عرفتها للجريمة الغير مقصودة المادة 190 من قانون العقوبات السوري فقالت : " تكون الجريمة غير مقصودة سواء لم يتوقع الفاعل نتيجة فعله أو عدم فعله المخطئين وكان في استطاعته أو من واجبه أن يتوقعها فحسب أن بإمكانه اجتنابها " .

* و بناء على هالحكي المسؤولية بتحقق بحالتين  على الفاعل :

أ- عدم توقع النتيجة مع إمكانية أو وجوب انو يتوقعها الفاعل ، هون الخطأ كان بسبب سهو الفاعل عن توقع النتيجة يلي صارت بسبب فعلو ، ولو انو بذل العناية الكافية المألوفة للشخص العادي ما كان صار هيك شي ، يعني سها الفاعل عن توقع نتائج فعلو بالرغم من قدرتو على توقع الضرر الي ممكن يصير بسببو هو السبب الحقيقي لمحاسبتو قانونا.

ب- توقع نتيجة فعلو و اعتقد بإنو بإمكانه يتجنبها .

#العقوبات :

لو افترضنا انو الفاعل كان بحيز صغير و ما حدا أطلق النار غيرو يعني كان معروف او واضح انو هو المسبب لان متل ما بنعرف بالمناسبات ما حدا بيعرف رصاصة مين رح تنزل على راس مين ،، بس من باب التثقيف القانوني والا بتكون جريمة مرتكبها مجهول ، لنفترض انو الفاعل كان محدد و معروف .

فإما تكون النتيجة :  1- التسبب بالوفاة بدون قصد . 2- التسبب بالإيذاء الغير مقصود .

1- حالة التسبب بالوفاة بدون قصد : المادة 550 من قانون العقوبات السوري عاقبت بالحبس من ستة أشهر إلى ثلاث سنوات .

و على هاد الشي نصت المادة /550 /من قانون العقوبات بقولها "  : من سبب موت أحد عن إهمال أو قلة احتراز أو عدم مراعاة القوانين والأنظمة عوقب بالحبس من ستة أشهر إلى ثلاث سنوات " . 

2- في حال التسبب بالإيذاء بدون قصد  :

عاقب قانون العقوبات على التسبب بالإيذاء غير المقصود و قسم الايذاء والعقوبة على حسب مدة تعطيل المضرور  عن العمل يعني بالفقرة الأولى من المادة يلي رح نذكرها كمثال إذا كان التعطيل فوق العشرين بيكون العقاب من شهرين إلى السنة ، أما إذا كان غير هي الحالة متل تعطيل عن العمل أقل من عشرة أيام بتكون العقوبة الحبس ستة أشهر على الأكثر و غرامة .

و هاد الشي نص عليه المادة / 551/ من قانون العقوبات حسب التالي  :

" 1 ـ إذا لم ينجم عن خطأ المجرم الا ايذاء كالذي نصت عليه المواد الـ 542 إلى الـ 544 كان العقاب من شهرين إلى سنة.

2 ـ يعاقب على كل ايذاء آخر غير مقصود بالحبس ستة أشهر على الأكثر أو بغرامة لا تتجاوز ألفي ليرة سورية... " .

طبعاً من الجدير بالذكر انو الفقرة / 3 / ، من المادة المذكورة علقت ملاحقة الفاعل و تحريك الدعوى العامة بحقو على شكوى المضرور إذا ما تجاوزت مدة التعطيل عن العمل عشرة أيام ، و إذا تنازل المضرور عن الشكوى بتسقط دعوى الحق العام .

و حتى لو كان الهدف من إطلاق النار التعبير عن الفرح أو الحزن فهاد الشي ما بيندرج ضمن الأسباب المخففة للعقوبة ولا الأعذار المحلة من العقاب بعكس الدافع الشريف يلي بيخفض العقوبة متل مثال إطلاق الرصاص في الهوا على اللصوص حاولوا الدخول على مزرعة أحد الأشخاص بدون إصابة أحدهم بهدف يخليهم يهربوا .

بالنهاية بنحب نأكد على عدم حضارية هاد الفعل ، و أحيانا و انت عم تعبر عن فرحك او مشاعرك ممكن تنهي حياة شخص تاني أو تغير حياتو بدون قصدك حتى لو مفكر انك ما عم تعمل شي غلط لان غالباً ما رح تدرى إذا صار في شخص إنصاب بالشلل نتيجة رصاص طائشة من سلاحك اثناء احتفالك ، و نعتبر للنتائج السيئة لهاد الفعل بغض النظر عن المسؤولية القانونية و نتمنى توصل الرسالة و يمتنعوا الناس يلي ما رح ترد طبعاً و رح تعبر عن مشاعرها بإطلاق الرصاص بالهواء .
 

***

 

التنويه  : إن هذا المقال كتب باللهجة العامية المحكية لسهولة إيصال المعلومة و سلاسة القراءة ، وهو عبارة عن مقال مختصر و مبسط للموضوع ، جميع حقوق الملكية الفكرية محفوظة و في حال نسخ المعلومة  يرجى الحفاظ على الأمانة العلمية بالنقل .

 

للتواصل مع كاتب المقال لمزيد من المعلومات أو الاستشارات القانونية حول الموضوع :

Mobile : 0948889987

E-Mail : [email protected]

Facebook : https://www.facebook.com/hussam.KRE